ຄະນະນໍາ, ຄູຝຶກ ແລະ ນັກກິລາຄົນພິການລາວ ໄດ້ເດີນທາງເຖິງ ນະຄອນຫຼວງປາຣີ ປະເທດຝຣັ່ງ ເປັນທີ່ຮຽບຮ້ອຍແລ້ວ ໃນວັນທີ 25 ສິງຫາ ຜ່ານມາ ພາຍຫຼັງໄດ້ເດີນທາງຈາກສປປ ລາວ ໃນຕອນແລງວັນທີ 24 ສິງຫາ 2024 ທີ່ສະໜາມບິນສາກົນວັດໄຕ ເພື່ອເຂົ້າຮ່ວມງານກິລາພາຣາແລມປິກເກມ 2024 ທີ່ປະເທດຝຣັ່ງ ຮັບກຽດເປັນເຈົ້າພາບ ລະຫວ່າງວັນທີ 28 ສິງຫາ ຫາ 8 ກັນຍາ 2024.
ໃນການເຂົ້າຮ່ວມງານກິລາດັ່ງກ່າວ ນຳຄະນະໂດຍ ທ່ານ ນາງ ຂັນທະລີ ສີຣິພົງພັນ ປະທານຄະນະກຳມະການພາຣາແລມປິກແຫ່ງຊາດລາວ(ຄພລ) ແລະ ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ(ຄພລ) ສ່ວນຕົວແທນນັກກິລາລາວ ທ້າວ ແກ່ນ ເທບທິດາ ນັກກິລາເຕັ້ນຍາວຄົນພິການທີມຊາດລາວ (ປະເພດສາຍຕາສັ້ນ ຫຼື ຄາດທີ13) ທີ່ໄດ້ຮັບໂຄຕ້າໜຶ່ງດຽວຈາກລາວເຂົ້າຮ່ວມແຂ່ງຂັນ.
ງານມະຫາກຳກິລາພາຣາແລມປິກ ເກມ 2024 ປີນີ້ ຈະມີນັກກິລາຄົນພິການທົ່ວໂລກເຂົ້າຮ່ວມແຂ່ງຂັນຫຼາຍຮ້ອຍຄົນ, ໃນນັ້ນ ຈະມີການຊີງໄຊທັງໝົດ 22 ປະເພດກິລາ ແລະ ຈະມີການຊີງໄຊ 549 ຫຼຽນຄຳ ສະເພາະ ສປປ ລາວ ໄດ້ສົ່ງນັກກິລາເຂົ້າຮ່ວມແຂ່ງຂັນພຽງ 1 ຄົນ ກໍຄື ທ້າວ ແກ່ນ ເທບທິດາ ນັກກິລາເຕັ້ນຍາວຄົນພິການທີມຊາດລາວ.
ທ້າວ ແກ່ນ ເທບທິດາ ເປັນນັກກິລາຄົນພິການລາວ ໄດ້ເຂົ້າຮ່ວມງານມະຫາກຳກິລາ ພາຣາແລມປິກເກມ ທີ່ນະຄອນຫຼວງ ໂຕກຽວ ປະເທດຍີ່ປຸ່ນມາແລ້ວ ຊຶ່ງໃນຄັ້ງນັ້ນ ແກ່ນ ເທບທິດາ ໄດ້ລົງຫຼິ້ນກິລາປະເພດແລ່ນ 100 ແມັດຊາຍ ປະເພດຄາດທີ 13 ຊຶ່ງຄັ້ງນີ້ ແກ່ນ ກໍພໍມີໂອກາດລຸ້ນສ້າງຜົນງານ ດ້ວຍສະຖິຕິທີ່ໂດດໄດ້ 6 ແມັດກວ່າໆ ຫາກທຽບໃສ່ສະຖິຕິໂລກ ທີ່ນັກກິລາຄົນພິການຂອງປະເທດກຸຍບາ ທີ່ເຮັດໄດ້ 7,41 ແມັດ ເມື່ອປີ 2012 ຜ່ານມາ.