ໜ່ວຍພັກຮາກຖານກົມກິລາມວນຊົນ, ພະລະ ແລະ ສິລະປະສຶກສາ ຫຼື ກພສ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມໃຫຍ່ ຄັ້ງທີ I ເມື່ອວັນທີ 16 ສິງຫາ 2024 ພາຍໃຕ້ການເປັນປະທານຂອງ ສະຫາຍ ກິ່ງມະໂນ ພົມມະຫາໄຊ ຄະນະປະຈໍາພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ)
, ມີປະທານກວດກາພັກກະຊວງ, ເລຂາໜ່ວຍພັກຮາກຖານ ກພສ ພ້ອມດ້ວຍຄະນະ, ຄະນະຮັບຜິດຊອບຊີ້ນໍາ, ຊຸກຍູ້, ຕິດຕາມການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ທີ່ຂຶ້ນກັບອົງຄະນະພັກ ສສກ ກຸ່ມທີ 4 ເຂົ້າຮ່ວມ 6 ສະຫາຍ, ຍິງ 2 ສະຫາຍ, ສະມາຊິກພັກສົມບູນ 41 ສະຫາຍ, ຍິງ 17 ສະຫາຍ, ແຂກຖືກເຊີນ 9 ສະຫາຍ, ຍິງ 2 ສະຫາຍ.
ກອງປະຊຸມໃຫຍ່ ຄັ້ງທີ I ຂອງໜ່ວຍພັກຮາກຖານ ກພສ ໄດ້ລົງປະຊາມະຕິເປັນເອກະສັນກັນ ຮັບຮອງເອົາບັນດາເນື້ອໃນທີ່ສໍາຄັນ ໂດຍພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ ແລະ ບົດສຳຫຼວດການນຳພາລວມຂອງຄະນະໜ່ວຍພັກຊຸດເກົ່າ ຊຶ່ງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນໃນການນໍາພາ-ຊີ້ນຳ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ໃນ 5 ປີຜ່ານມາ. ພ້ອມນີ້, ກອງປະຊຸມຍັງໄດ້ເຫັນດີເປັນເອກະສັນກັນ ຮັບຮອງເອົາບົດລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະພັກຊຸດເກົ່າ ແລະ ຮັບຮອງເອົາແຜນການນໍາພາ-ຊີ້ນໍາລວມຂອງຄະນະໜ່ວຍພັກໃນ 5 ປີຕໍ່ໜ້າ (2025-2030).
ພ້ອມນັ້ນ, ກອງປະຊຸມໄດ້ຟັງລາຍງານ ແລະ ການປະກອບຄຳເຫັນຈາກຜູ້ຕາງໜ້າຫຼາຍພາກສ່ວນ ຊຶ່ງສະແດງໃຫ້ເຫັນເຖິງຄວາມເປັນເອກະພາບ ຕໍ່ບົດລາຍງານການເມືອງ, ບົດສຳຫຼວດການນໍາພາລວມຂອງຄະນະໜ່ວຍພັກ, ທິດທາງ, ແຜນການ ແລະ ວຽກງານຮອບດ້ານຕໍ່ກອງປະຊຸມ ສ່ວນຫຼາຍໄດ້ລົງເລິກລາຍງານຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ເຂົ້າໃນແຕ່ລະຂົງເຂດວຽກງານກົມກອງ, ຂະແໜງການຂອງຕົນອັນໄດ້ເຮັດໃຫ້ກອງປະຊຸມມີເນື້ອໃນອຸດົມສົມບູນຂຶ້ນຕື່ມ.
ຫຼັງຈາກນັ້ນ, ຜູ້ແທນກອງປະຊຸມ ຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກເອົາຄະນະໜ່ວຍພັກຮາກຖານຊຸດໃໝ່ ຊຶ່ງມີຜູ້ອອກຮັບສະໝັກເລືອກຕັ້ງ ຈຳນວນ 7 ສະຫາຍ, ຍິງ 3 ສະຫາຍ ເລືອກເອົາ 5 ສະຫາຍ. ຜ່ານການນັບຄະແນນຜົນປະກົດວ່າສາມາດເລືອກໄດ້ ສະຫາຍ ວິລະວັນ ບຸນສຸກໄທ ເປັນເລຂາໜ່ວຍພັກຮາກຖານຊຸດໃໝ່, ສະຫາຍ ນາງ ຈັນທາ ຫຼວງອາໄພ ເປັນຮອງເລຂາໜ່ວຍພັກ, ສະຫາຍ ຫຼອດສະຖິດ ສຸຂະຜົນ ເປັນຄະນະ, ສະຫາຍ ນິດຕະກອນ ສີປະເສີດ ເປັນຄະນະ ແລະ ສະຫາຍ ລັດທະໄຊ ອິນທະວົງ ເປັນຄະນະ ແລະ ປະທານກວດກາໜ່ວຍພັກຮາກຖານ. ພ້ອມດຽວກັນນັ້ນ, ກອງປະຊຸມໄດ້ຕົກລົງເລືອກເອົາປະທານກວດກາໜ່ວຍພັກ ແລະ ຮອງປະທານກວດກາໜ່ວຍພັກ ຕື່ມອີກ ໂດຍເລືອກສະຫາຍ ລັດທະໄຊ ອິນທະວົງ ເປັນປະທານກວດກາໜ່ວຍພັກຮາກຖານ ແລະ ສະຫາຍ ນາງ ດວງພະຈັນ ສຸລິດນະລາດ ເປັນຮອງປະທານກວດກາໜ່ວຍພັກຮາກຖານ.
ໂອກາດນີ້, ສະຫາຍ ກິ່ງມະໂນ ພົມມະຫາໄຊ ກໍໄດ້ສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນໍາ ຂອງຄະນະພັກຊຸດເກົ່າ ທີ່ມີຜົນສຳເລັດໃນໜ້າທີ່ການເມືອງຂອງຕົນ, ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນ ສະຫາຍຍັງໄດ້ສະແດງຄວາມເປັນຫວ່ງເປັນໄຍຕໍ່ດ້ານອ່ອນ, ຂໍ້ຄົງຄ້າງຫຼາຍດ້ານ ພ້ອມທັງໃຫ້ທິດຊີ້ນຳ ແລະ ຮຽກຮ້ອງໃຫ້ຄະນະພັກຊຸດໃໝ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ, ຄະນະໜ່ວຍພັກຊຸດໃໝ່ ຈະນໍາໄປຈັດຕັ້ງຜັນຂະຫຍາຍເຂົ້າໃນແຜນການນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກ ໃຫ້ຍາດໄດ້ຜົນງານ ແລະ ຜົນສຳເລັດຍິ່ງໃຫຍ່ກວ່າເກົ່າ ສະນັ້ນ ບັນດາສະຫາຍສະມາຊິກພັກ, ພະນັກງານ ກໍຈົ່ງເພີ່ມກັນທະວີເຊີດຊູສະຕິຄວາມເປັນແບບຢ່າງນໍາໜ້າໃນທຸກດ້ານ ແລະ ຄວາມຮັບຜິດຊອບໜ້າທີ່ການເມືອງຂອງຕົນ, ນໍາພາສະມາຊິກພັກ ແລະ ມະຫາຊົນ ປະຕິບັດມະຕິກອງປະຊຸມໃຫຍ່ຄັ້ງນີ້ ໃຫ້ປະກົດຜົນເປັນຈິງ ເຮັດໃຫ້ວຽກງານກິລາມວນຊົນ, ພະລະ ແລະ ສິລະປະສຶກສາ ມີການຫັນປ່ຽນໃໝ່ທີ່ຕັ້ງໜ້າ ແລະ ພັດທະນາຂຶ້ນຢ່າງບໍ່ຢຸດຢັ້ງ, ເຮັດໃຫ້ພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ.