- ພາລະບົດບາດ:
ກົມກິລາມວນຊົນ, ພະລະ ແລະ ສິລະປະສຶກສາ ຂຽນດ້ວຍຕົວອັກສອນຫຍໍ້ "ກພສ" ເປັນກົງຈັກບໍລິຫານ-ຄຸ້ມຄອງວິຊາການ ໃນໂຄງປະກອບການຈັດຕັ້ງ ຂອງກະຊວງສຶກສາທິການ ແລະ ກິລາ ມີພາລະບົດ ບາດເປັນເສນາທິການໃຫ້ແກ່ລັດຖະມົນຕີ ກ່ຽວກັບການຄຸ້ມຄອງ, ຊຸກຍູ້, ສົ່ງເສີມ ແລະ ພັດທະນາ ວຽກງານກິລາ-ກາຍຍະກຳມວນຊົນ, ກິລາ-ກາຍຍະກໍາຄົນພິການ, ພະລະສຶກສາ, ສິລະປະສຶກສາ, ສຶກສາປ້ອງກັນຊາດ-ປ້ອງກັນຄວາມສະຫງົບ, ຕ້ານສິ່ງເສບຕິດໃນໂຮງຮຽນ ແລະ ຈັດການແຂ່ງຂັນກິລາ-ກາຍຍະກຳມວນຊົນ, ກິລາ-ກາຍຍະກຳຄົນພິການ, ກິລານັກຮຽນ-ນັກສຶກສາ, ການແຂ່ງຂັນສິລະປະວັນນະຄະດີ-ສິລະປະກໍາ ສຳລັບນັກຮຽນ-ນັກສຶກສາ ທັງພາກລັດ, ເອກະຊົນ ແລະ ເຂົ້າຮ່ວມການແຂ່ງຂັນກິລາທັງພາຍໃນ ແລະ ຕ່າງປະເທດ
- ສິດ ແລະ ໜ້າທີ່:
- ຜັນຂະຫຍາຍແນວທາງນະໂຍບາຍ, ກົດລະບຽບ, ມະຕິ, ຄໍາສັ່ງຂອງພັກ, ກົດໝາຍຂອງລັດ, ທິດທາງ, ແຜນການ ແລະ ຍຸດທະສາດ ຂອງກະຊວງສຶກສາທິການ ແລະ ກິລາ ເພື່ອສ້າງເປັນແຜນພັດທະນາວຽກງານກິລາມວນຊົນ, ພະລະ ແລະ ສິລະປະສຶກສາ;
- ສ້າງ, ປັບປຸງ ນິຕິກໍາ ແລະ ມາດຕະຖານຕ່າງໆ ເພື່ອບໍລິຫານ-ຄຸ້ມຄອງວຽກງານກິລາມວນຊົນ, ພະລະ ແລະ ສິລະປະສຶກສາ;
- ສ້າງແຜນ ກໍ່ສ້າງຄູ ແລະ ບໍາລຸງຄູ ພະລະສຶກສາ, ສິລະປະສຶກສາ ໂດຍປະສານສົມທົບກັບກົມສ້າງຄູ ແລະ ພາກສ່ວນທີ່ກ່ຽວຂ້ອງ ໃນການສ້າງຄູພະລະສຶກສາ ແລະ ຄູສິລະປະສຶກສາ;
- ຊີ້ນໍາ, ຊຸກຍູ້ ແລະ ສົ່ງເສີມ ການສ້າງຄວາມເຂັ້ມແຂງ ໃຫ້ແກ່ບຸກຄະລາກອນ ກ່ຽວກັບວຽກງານກິລາ-ກາຍຍະກຳມວນຊົນ, ກິລາ-ກາຍຍະກໍາຄົນພິການ, ພະລະສຶກສາ, ສິລະປະສຶກສາ, ສຶກສາປ້ອງກັນ ຊາດ-ປ້ອງກັນຄວາມສະຫງົບ, ຕ້ານສິ່ງເສບຕິດໃນໂຮງຮຽນ, ຫຼັກສູດທ້ອງຖິ່ນ ໂດຍປະສານສົມ ທົບກັບພາກສ່ວນທີ່ກ່ຽວຂ້ອງ ຕາມການແບ່ງຂັ້ນຄຸ້ມຄອງ;
- ຊີ້ນໍາ ການສ້າງ, ປັບປຸງ ແລະ ຄຸ້ມຄອງ ຫຼັກສູດ, ປຶ້ມຄູ່ມື, ສື່ການຮຽນ-ການສອນ ຮັບໃຊ້ການກໍ່ສ້າງ ແລະ ບໍາລຸງຄູ ພະລະສຶກສາ, ສິລະປະສຶກສາ ໂດຍປະສານສົມທົບກັບພາກສ່ວນທີ່ກ່ຽວຂ້ອງ;
- ຊຸກຍູ້, ສົ່ງເສີມການສ້າງ, ປັບປຸງ, ການພັດທະນາ ແລະ ການຈັດຕັ້ງປະຕິບັດ ຫຼັກສູດພະລະສຶກສາ, ສິລະປະດົນຕີ, ສິລະປະກຳ, ສຶກສາວິຊາພື້ນຖານປ້ອງກັນຕົວ, ວິຊາສຶກສາປ້ອງກັນຊາດ-ປ້ອງກັນຄວາມສະຫງົບ ແລະ ຫຼັກສູດທ້ອງຖິ່ນ ຮັບໃຊ້ສາຍສາມັນສຶກສາ, ສາຍອາຊີວະສຶກສາ ແລະ ການສຶກສາຊັ້ນສູງ ໂດຍປະສານສົມທົບກັບພາກສ່ວນກ່ຽວຂ້ອງ;
- ຊຸກຍູ້, ສົ່ງເສີມ ໃນການສ້າງສະຖານທີ່ ສວນສາທາລະນະສຸຂະພາບ ເພື່ອເປັນບ່ອນຫັດກາຍຍະບໍລິ ຫານ, ອອກກຳລັງກາຍ ແລະ ຫຼີ້ນກິລາ-ກາຍຍະກຳມວນຊົນ ໂດຍປະສານສົມທົບກັບພາກສ່ວນທີ່ກ່ຽວຂ້ອງ ຕາມການແບ່ງຂັ້ນຄຸ້ມຄອງ;
- ຊຸກຍູ້, ສົ່ງເສີມ ແລະ ຄຸ້ມຄອງ ຫົວໜ່ວຍທຸລະກິດກິລາ-ກາຍຍະກຳມວນຊົນ ແລະ ຄ່າບໍລິການ ຂອງຫົວໜ່ວຍທຸລະກິດກິລາມວນຊົນ ໂດຍສົມທົບພາກສ່ວນທີ່ກ່ຽວຂ້ອງ ຕາມການແບ່ງຂັ້ນຄຸ້ມຄອງ;
- ຊຸກຍູ້, ສົ່ງເສີມ ການເຄື່ອນໄຫວ ຂອງຄະນະກຳມະການພາຣາແລມປິກແຫ່ງຊາດລາວ, ສະຫະພັນກິລານັກຮຽນສາມັນລາວ, ບັນດາສະຫະພັນກິລາຄົນພິການ ແລະ ສະໂມສອນກິລາຄົນພິການລະດັບຊາດ;
- ຊຸກຍູ້ ແລະ ສົ່ງເສີມ ພົນລະເມືອງລາວ ທຸກເພດ, ທຸກໄວ ເຂົ້າຮ່ວມການຫັດກາຍຍະບໍລິຫານ, ອອກກຳລັງກາຍ ແລະ ຫຼິ້ນກິລາ-ກາຍຍະກໍາມວນຊົນ ໃນຂອບເຂດທົ່ວປະເທດ ຕາມການແບ່ງຂັ້ນຄຸ້ມຄອງ;
- ຊີ້ນໍາ, ຊຸກຍູ້ ແລະ ສົ່ງເສີມ ການຕ້ານສິ່ງເສບຕິດ, ຕ້ານການນຳໃຊ້ສານຕ້ອງຫ້າມໃນກິລາ ພາຍໃນສະ ຖານການສຶກສາ, ສ້າງຂະບວນການຈັດກິດຈະກຳການແຂ່ງຂັນກິລາ-ກາຍຍະກຳມວນຊົນ, ກິລາ-ກາຍຍະກໍາຄົນພິການ, ກິລານັກຮຽນ-ນັກສຶກສາ, ສິລະປະວັນນະຄະດີ-ສິລະປະກໍາ ປະຈຳປີ, ວັນບຸນປະເພນີ, ວັນສໍາຄັນຕ່າງໆຂອງຊາດ-ສາກົນ ຢູ່ພາຍໃນປະເທດ, ເຂົ້າຮ່ວມການແຂ່ງຂັນຢູ່ຕ່າງປະເທດ ຕາມການແບ່ງຂັ້ນຄຸ້ມຄອງ.
- ຈັດງານມະຫາກໍາກິລານັກຮຽນມັດທະຍົມສຶກສາທົ່ວປະເທດ ແລະ ເຂົ້າຮ່ວມແຂ່ງຂັນກິລານັກຮຽນສາມັນອາຊຽນ, ສາກົນ ໂດຍສົມທົບກັບພາກສ່ວນທີ່ກ່ຽວຂ້ອງ;
- ຈັດງານແຂ່ງຂັນກິລາຄົນພິການທົ່ວປະເທດ ແລະ ເຂົ້າຮ່ວມງານແຂ່ງຂັນກິລາຄົນພິການ ລະດັບພາກພື້ນ ແລະ ສາກົນ ໂດຍສົມທົບກັບພາກສ່ວນທີ່ກ່ຽວຂ້ອງ;
- ປົກປ້ອງ ຊັບສິນທາງປັນຍາ ແລະ ອານຸລັກແບບຫຼີ້ນພື້ນເມືອງ ແລະ ການແຂ່ງຂັນກິລາພື້ນເມືອງ;
- ຊີ້ນໍາ ການຈັດການຮຽນ-ການສອນ, ການສ້າງສະຖານທີ່ຈັັດການຮຽນ-ການສອນວິຊາພະລະສຶກສາ, ສິລະປະດົນຕີ, ສິລະປະກໍາ, ສຶກສາວິຊາພື້ນຖານປ້ອງກັນຕົວ, ວິຊາສຶກສາປ້ອງກັນຊາດ-ປ້ອງກັນຄວາມສະຫງົບ ໃນສາຍສາມັນສຶກສາ, ອາຊີວະສຶກສາ, ການສຶກສາຊັ້ນສູງ ທັງພາກລັດ ແລະ ເອກະຊົນ. ພ້ອມທັງກວດສອບຄວາມສົມບູນທາງກາຍຍະພາບ ຂອງນັກຮຽນຕາມເກນອາຍຸ ຢູ່ໃນສາຍສາ ມັນສຶກສາ ໃນຂອບເຂດທົ່ວປະເທດ;
- ຊີ້ນຳ ແລະ ຄຸ້ມຄອງ ວິທະຍາໄລພະລະສຶກສາ, ວິທະຍາໄລສິລະປະສຶກສາ ຕາມການແບ່ງຂັ້ນຄຸ້ມຄອງ;
- ຄົ້ນຄວ້າ ການສ້າງສັນຍາ ແລະ ບົດບັນທຶກຄວາມເຂົ້າໃຈການຮ່ວມມື ດ້ານກິລາ-ກາຍຍະກຳມວນຊົນ, ກິລາ-ກາຍຍະກໍາຄົນພິການ, ພະລະ ແລະ ສິລະປະສຶກສາ ກັບອົງການຈັດຕັ້ງສາກົນ ແລະ ຄູ່ຮ່ວມພັດທະນາ ພ້ອມທັງຄຸ້ມຄອງຊ່ຽວຊານ ແລະ ອາສາສະໝັກ ທີ່ມາປະຕິບັດວຽກງານດັ່ງກ່າວ ໂດຍການປະສານສົມທົບກັບພາກ ສ່ວນທີ່ກ່ຽວຂ້ອງ;
- ສ້າງ ແລະ ປັບປຸງ ລະບົບຖານຂໍ້ມູນ ກ່ຽວກັບການຄຸ້ມຄອງວຽກງານ ກິລາ-ກາຍຍະກຳມວນຊົນ, ພະລະ ແລະ ສິລະປະສຶກສາ ໂດຍອີງໃສ່ມາດຕະຖານການຄຸ້ມຄອງຂໍ້ມູນຂະແໜງການສຶກສາທິການ ແລະ ກິລາ;
- ຄົ້ນຄ້ວາ, ພັດທະນາ ການສ້າງລາຍການໂທລະພາບໂຄສະນາວຽກງານກິລາ-ກາຍຍະກຳມວນຊົນ, ກິລາ-ກາຍຍະກໍາຄົນພິການ, ພະລະ ແລະ ສິລະປະສຶກສາ ໂດຍການປະສານສົມທົບກັບພາກສ່ວນທີ່ກ່ຽວຂ້ອງ;
- ຄົ້ນຄ້ວາຮູບແບບ, ວິທີການ, ຂັ້ນຕອນ, ເນື້ອໃນພິທີທາງການ ວຽກງານພິທີເປີດ-ປິດງານມະຫາກໍາກິລາລະດັບຊາດ ໂດຍການປະສານສົມທົບກັບພາກສ່ວນທີ່ກ່ຽວຂ້ອງ;
- ພົວພັນ ແລະ ປະສານງານກັບຫ້ອງການ, ກົມ, ອົງການເທົ່າກົມ, ສະຖາບັນ, ສູນ, ອົງການຈັດຕັ້ງສາກົນ ແລະ ອົງການຈັດຕັ້ງຕ່າງໆ ທັງພາກລັດ ແລະ ເອກະຊົນ ຕາມການມອບໝາຍຂອງລັດຖະມົນຕີ;
- ກວດກາ, ຕິດຕາມ ແລະ ປະເມີນຜົນ ພ້ອມທັງສະຫຼຸບ ລາຍງານການຈັດຕັ້ງປະຕິບັດວຽກງານຂອງຕົນ ໃຫ້ຂັ້ນເທິງ ເປັນປົກກະຕິ;
- ປະຕິບັດໜ້າທີ່ອື່ນ ຕາມການມອບໝາຍຂອງລັດຖະມົນຕີ.
